بيتكوين ايفون ولا 1/2 مليار جنيه؟؟؟

بيتكوين ايفون ولا 1/2 مليار جنيه؟؟؟

ايه الهبل ده؟! فعلا هو هبل بس حقيقي
ما اهو انت لو صحيت من النوم لقيت حد بيقولك انك لو مكنتش اشتريت الايفون بتاعك من 7 سنين كان زمانك 1/2 ملياردير دلوقت حتقول عليه مجنون. ايه يا عم الحاجة اللي كان ممكن اشتريها ب 6000 جنيه و قيمته دلوقت عدت النص مليار بالتحديد 648 مليون جنيه.

Bitcoinلحد النهاردة الصبح مكنتش اعرف ايه البتاع ده كنت عارف الاسم بس مهتمتش اعرف هو ايه بس المبلغ اثر في نفسيتي و حفز الشخصية المادية الحقيرة تخليني انكش وراه و قولت اشارككم النكش ده.
ايه هو البيتكوين ده جه منين اجيبه منين طيب طب وصل للقيمة ديه ازاي ده اللي حنعرفه في المقال ده .... و انا بحاول افهم معاكوا عشان الموضوع معقد حبتين.



مبدأيا كده انا عارف ان ده اللي قتل كونان ظهر اول مرة اسم الBitcoin في  2010 / 2009 في ورقة بحث لشخص اسمه (ساتوشي ناكاموتو) اسم مستعار لشخص ما اسم رمزي لمجموعة اشخاص او منظمة ما اختلفت الاقاويل حوالين الموضوع ده بس الفكرة اللي في البحث اللي ظهر من اللا مكان ده لقت ترحيب من طبقة معينة من الناس لاسباب حقولهالكم دلوقت.
مبدايا كده العملة ديه عملة افتراضية ملهاش جسم مادي يعني لا هي ورق ولا كوينات ولا في ما يقابلها دهب او سندات في مكان ما عالكوكب زي اي عملة اتعامل بيها الانسان يعني العملة عبارة عن كود. طب مين اللي بيطرح العملة ديه اصلا او بتتجاب منين او مين اللي بيكتب الكود ده.
احنا اتفقنا ان العملة عبارة عن كود زي اللي بيبرمجوا بيه كده فاكيد اللي بيولد الكود ده برنامج هنا حيظهر مصطلح معانا اسمه Mining او تعدين.
نونوت معاك يبقي معاك Bitcoin هات اللاب بتاعك او الكمبيوتر نزل برنامج من بتوع التعدين حنحط ل/أمثلة في اخر المقال المهم حيبدأ الكمبيوتر بتاعك يولد ببطء Bitcoins و حسب قوةالكمبيوتر بتاعك (كارت الشاشة تحديدا) و الوقت حتاخد Bitcoins مقابل ايه بقي انه يستخدم المعالج بتاعك في معالجة بيانات الBitcoins حول العالم مستخدم مبدأ Peer to peer لو استخدمت برامج الTorrent  قبل كده اكيد حتبقي عارف التقنية ديه كل واحد بيبقي عنده جزء من المعلومات بيتغير باستمرار و لما حد بيعوز المعلومة بتيجي من الجهاز اللي هي فيه دلوقت. تهتوا مني ولا لسه؟؟؟؟
بس ديه ميزة من مميزات العملة ديه لاانها بالشكل ده غير قابلة للتتبع أو التحكم أو الاختراق لان المعلومة اللي انت عايزها ببساطة انت مش عارف هي فين مفيش غير الشخص اللي بيملكها او بيتعامل بيها هو اللي معاه المعلومة ديه و لما هو يطلبها بس.

احنا لحد دلوقت معانا ايه:
1-عملة افتراضية ملهاش وجود مادي.
2-مفيش بنك او دولة طارحة العملة انت منك للشخص الي بتبيع او بتشتري منه بدون وسيط مفيش لا عمولة ولا قيود.
3-البيانات متنطورة علي مستوي العالم فمحدش حيقدر يتتبع عمليات البيع او الشرا بتاعتك.
4- زود ديه عدد العملات محكوم بخواريزمية معينة بحيث ميزيدش عدد العملات عن 21 مليون Bitcoin لما بيوصل عددالعملات المولدة للرقم ده بيتقسم قيمته علي عدد اللي بستخدموا برنامج التعدين دلوقت و حسب قوة المعالجة بتاعتهم بياخدوا مقابلها Bitcoins كجايزة لمعالجة البيانات يعني كل ما جهازك يكون أقوي تقدر تحل خواريزمات أسرع و تاخد بيتكوينز أكتر.

جمهور العملة الاولي كان تجار المخدرات و السلاح و اي عملية غير مشروعة ببساطة مش عايزة تحويلاتها المالية تتكشف بس بدأ مواقع كتير اولهم مواقع استضافة الويب يقبلوا الدفع بالعملة ديه و مع تزايد المستخدمين و زيادة تداولها بشكل الكبير بدأت قميتها في الازدياد قدام الدولار و العملات التانية لأن زي ما احنا عرفين العملات الحرة بتتحدد قيمتها بقانون العرض و الطلب زي الجنيه بالظبط لما اتعوم (بلا وكسة 😏)
العرض و الطلب خلا قيمتها ترتفع من 6 سنت للقيمة العالية اللي ذكرتها في أول الموضوع
و برغم مميزات العملة ديه و أنها بعيدة كل البعد عن التضخم و طباعة الفلوس عمال على بطال إلا أنها برضوا فيها مخاطر و ده لان قيمتها بتتغير تغيرات حادة جدا يعني ممكن يوم تلاقيها ب1000$ شوية تلاقيها 600$ و ترجع تلاقيها ضربت ال1000$ تاني و هكذا

كمان عملية التعدين معادلات أسطورية بحته و خوارزميات مش معروفة هي اللي يتحدد كل حاجة و اللي بيلحق يحل الأول هو اللي بياخد البيتكوينز اللي هو انت مش عارف هو مين ولا قدرات اجهزته أيه
 فكرة الاعتماد على قوة الحواسيب تقلق لأن في زعم ان فيه أشخاص و منظمات أجروا سيرفرات قوية جدا عشان ينوبهم نصيب الأسد في عملية الMining فأنت مستحيل تقدر تنافس معاهم و تحللك حته معادلة صغيرة.
ولا بيصونوا اللقمة الحرام 😂😂😂😂😂😂
حاليا تم تعدين حوالي 18 مليون بيتكوين و الباقي بيتم تعدينهم بصعوبة نظرا لكثرة عدد المستخدمين و تفاوت قوة الأجهزة المستخدمة في التعدين الأمر اللي خلي أمكانية التعدين لشخص واحد أصبحت صعبة جدا و هتكون مكلفة اكثر من المكاسب اللي هتعود عليه من قيمة التعدين.
ده كل اللي عرفته و فهمته عن الموضوع ده المناقشة مفتوحة لأي استفسار أو أي حد عايز يضيف معلومة يقدر يكومنت على المقال أو على صفحتنا عالفيسبوك.
برامج الMining بتاعت الBitcoin
ملحوظة انا مستخدمتهاش ولا أعرف مصداقيتها من عدمه ديه مجرد أمثلة:
CGminer
BFGminer
BitMinter
BTCminer
Poclbm
Written by: Amr Khaled - T.Rex
#AK_TRex
#TRex_Magazine
التعليقات
0 التعليقات