خلق البعض لتشكيل عالمنا -البداية-

خلق البعض لتشكيل عالمنا -البداية-

ايه اللي بيحدد مدي نجاح الانسان في رحلة حياته؟!  
في تقييمك لنفسك اللي المفروض يكون الحافز الوحيد ليك للتقدم المستمر المفروض يتنسب لايه؟
يعني و انا بقييم نفسي امته اقدر اقول انا ناجح او امتي اقدر اقول ان انا علي الطريق الصح؟
طبعا ده بيختلف من شخص للتاني علي حسب الاهداف اللي انت بتحددها لنفسك في حياتك و الحاجات اللي بتصحي كل يوم تنزل شغلك تتحرك تتنفس تبذل طاقة عشان توصلها بس معظمنا بتدفعه قوة البحث وراء المادة اللي بتخليه يقدر يوفي بالتزامات حياته ايا كانت و اللي بتختلف من شخص للتاني كل واحد التزاماته ديه مهمة بالنسبالة ممكن تكون تفاهة بالنسبه لشخص تاني بس محدش يقدر يحدد ده الا الشخص نفسه. بس من وجهة نظري ايا كانت نجاحاتك وظيفتك بيتك رصيدك في البنك فيلة التجمع عربياتك .... ايا كان اللي انت بتمتلكه و الناس بتبصله علي انه انجاز او بتقييمك بيه علي انك شخص ناجح بينما النجاح الحقيقي بيكمن في مدي التاثير اللي انت حفرته في وجدان العالم بمعني انا اه اشتغلت و اغتنيت و حققت الرفاهية لنفسي و لعيلتي بس هل و انا بعمل ده اضفت قيمة للعالم هل ساعدت في تشكيلة ولا كنت في عداد المتفرجيين اللي بيتولدوا يستهلكوا و يموتوا و كان شئ لم يكن.

في سلسلة الكتابات ديه حنستعرض بعض الاشخاص اللي نجحوا في ده. نجحوا انهم يكون ليهم بصمة و انهم يخلدوا اسمهم في وجدان البشرية.عمل سكوب على الشخصيات ديه حيثبتلك شوية حاجات مهمة مبدايا كده إضافة قيمة للبشرية مش معناه انك تبقى زاهد في الدنيا بل بالعكس الشخصيات ديه نجحت أنها تكون ثروة كبيرة و هما بيعملوا ده.حتعرف ان ازاي الناس ديه بدأت من الصفر بس مشالوش زلط على كتفهم و حطوا القرش عالقرش زي سعد الدالي.هما اشتغلوا سمارت  و هارد في نفس الوقت و كان هدفهم أنهم يعملوا كيانات قبل ما يعملوا فلوس و ركزوا في ده و عملوا مجهود رهيب و عليه كسبوا من ده اللي محدش توقعه.
حنبدأ السلسة بأيلون ماسك و ده لأنه فارض نفسه علي الساحة مفيش أسبوع بيعدي تقريبا من غير ابتكار أو اكتشاف أو اشيفمينت جديد للشركات بتاعته.
كانت هذه هي المقدمة و حنبدأ بأذن الله في القريب العاجل نسرد انجازات الشخصيات ديه و ازاي بدأوا و الجديد اللي بيقدموه ده بجانب المواضيع العادية اللي بتهتم بيها المدونة.
 تابعونا.تابعونا ايتها الجماهير العريضة!
-يا ابني أنت مفيش غيرك أنت و زوجتك معاهم لينك المدونة أصلا.
-تصدق اه !!!
Written by: Amr Khaled - T.Rex
#AK_TRex
#TRex_Magazine

التعليقات
0 التعليقات