AI / Machine Learning ؟!يعني اية
AI هي اختصار لكلمة Artificial Intelligence لو ترجمناها حرفيا حتبقي الذكاء الاصطناعي بس يعني ايه ذكاء اصطناعي اصلا باختصار شديد هو قدرة الالة علي التصرف في المواقف المختلفة دون تدخل العقل البشري.اي بيتم برمجتها في الدنيا بتتبع سلسة من الاوامر المنطقية مثلا المقارنة لو دوست الزرار ده الموتور ده يشتغل لو دوست مرتين الموتور يبطل. ديه كده تعتبر اله مسبقة البرمجة طيب لو محدش داس مرتين هل حيفضل الموتور يشتغل الي ما لا نهاية هنا انا مش مزوده باي شروط تانية زي لو الموتور سخن يفصل او لو لف عدد لفات معينة او لو اشتغل موتور تاني الاول يقف في ساعتها او بعد دقيقة او ساعة.....
لو هي مفتاح الذكاء الاصطناعي الشرط و التصرف و كل ما بزود الشروط بحيث ان الالة متوصلش انها متبقاش عارفة تتصرف ازاي كده تبقي البرمجة بتاعتي او الالة ديه البرنامج بتاعها اذكي بس ده لحد فترة قريبة بس.بمعني ان الالة مسبقة البرمجة اللي بتتصرف ضمن الشروط و القواعد اللي حطها المبرمج مش كفاية و هنا كان تساؤل العلماء هو ايه اللي خلانا كبشر اذكي من باقي المخلوقات كانت الاجابة هي القدرة علي التعلمز يعني انا لو قدرت اخلي الالة بتاعتي تتعلم ايا كانت الوسيلة حقدر احصل علي اله اذكي بتتطلب من العقل البشري تدخل اقل عشان يحللها مشاكلها.
Machine Learning او تعلم الالة و هنا بدأ نوع جديد من علوم الكمبيوتر يظهر وبدأ العلماء و المبرمجين يحاولوا يلاقوا طريقة ازاي يخلوا الالة تتعلم و تتصرف من تلقاء نفسها و تتعلم من اخطائها فمتككرهاش و بالتالي تلاقي حلول لمشكلاتها فيزداد ذكائها و يقل اعتماديتها علي العقل البشري بالعكس توصل انها هي اللي تحل المشكلة اللي الانسان بيعجز عن حلها لانها حتقدر توصل للمعلومات و تحلل البيانات بطريقة اسرع.الطرق كتير وخيال العلماء و افكارهم موقفتش و بيبتكروا كل ثانية جديد في الموضوع ده بل و الالات بتزيد ذكاء و بتتعلم منك.
مني انا؟ لا منك انت 😄.
ايوه منك انت موبايلك اللي بقي عارف يتوقع الكلمات و بيكملك جملك انت اللي علمته اتعلم اخطائك الاملائية و اتعلم انت حتكتب ايه بعد كده و انت بتكلم مين.جوجل حدث ولا حرج هو مش عارف انت عايز ايه من فراغ هو اتعلم من واحد زيك انت عايز ايه.
و مع كل كلمة و كل سيرش و كل شير او بوست بيتعلم اكتر.
عشان كده متستغربش لما تكون بتفكر تقضي اجازة انت او زوجتك وتلاقي الدنيا عندك اتقلبت مراجيح اعلانات علي الفيس و جوجل و في الميل كل دول عرفوا ان انا عايز اصيف ازاي الاجابة Machine Learning
ده مثال بسيط للي يقدر يعمله الذكاء الاصطناعي اللي اكتسب قدرة التعلم بس مش الوحيد و انت بتقرا الكلام ده في ذكاء اصطناعي بيبحث بين ملايين الاحتمالات عشان يصنع دوا جديد و في اخر بيحاول يدرس انماط في البورصة و يحاول يتوقع . مؤخرا قدر ان حتي يالف موسيقي و قصص قصيرة كل ده من التعلم.
الموضوع زي ما هو مشوق و يثير الحماسة قد ما هو مرعب لو فقدنا زمام الامور و فاقتنا الالات ذكاء متسلحة مثلا بكم المعلومات اللي علي شبكة الانترنت تخيل لو اله نجحت انها تلم بكل الحضارة البشرية في كيان واحد تفتكر لو بتتصرف من نفسها ممكن تعمل ايه طب حتكون ايه رغباتها اصلا او حتعالج كل البيانات ازاي. الخيال العلمي قدم اكتر من تصور للموضوع ده و قدملنا نماذج في الافلام زي VIKI في IRobot او Eagle Eye او المثال اللي بعتبره مناسب Ultron في Avangers لو انت معاك كل معطيات الحضارة البشرية حتبقي عايز تعمل ايه اظن اجابته انه يبيد البشرية لانهم حتي خطر علي انفسهم.
المقال القادم حتكلم عن AI تم اكسابه تقنية التعلم بستم اعطائه دافع للتعلم لاول مرة يستخدم الا و هو الفضول.
0 التعليقات